Hello 張  sir ，好耐冇見，你最近好嗎❤️我啱啱聽完你嘅電台節目。首先，好掛住你把磁性聲，哈哈～

你嘅分享令我諗起自己2021年考緊 DSE 通識卷嘅  moment，我一開卷就  highlight 重點字眼，然後分析題型，跟住就同時間鬥快。

我2003年出世，好幸運，返小學有常識堂、升上初中有生活與社會、高中有通識。細個爸爸媽媽話常識好有用，有助你增長日常知識。記得小學嘅時候已經背過處理污水嘅流程，琴晚聽到你嘅分享先知道原來渠務署都有份通識教材。小學嘅常識科、中學嘅通識科涵蓋嘅內容真係好多。

回想起 2015年嘅一個星期三，當時我中一，第一次入禮堂聽週會，週會題目係「六四」。當時，我一嚿飯，唔知道胡耀邦、鄧小平、趙紫陽係邊個，亦唔知道天安門廣場喺邊度，更加唔知道六四嘅意義係咩。

2018年，我中三，通識科開始要寫文，唔再係  MC 或者  fill in the blank 。我為咗要令通識科嘅成績進步，我去搵各個議題嘅例子及論據去支持論點，我開始「認真」對待通識。我開始明白點解我哋要學通識。好似你所講，唔係人哋話個政策好就好，學生都應該自己分析正反意見，再加個駁論說服人哋支持你嘅論點，我亦都開始知道原來社會有咁多問題值得我哋探討。

2019年，我中四了，我開始對社會有歸屬感，覺得自己對社會有責任了。我睇住新聞，見到香港人進行一次又一次遊行。今次，我唔再係一嚿飯，我知道點解佢哋要咁做，因為一國兩制嘅承諾好似開始變質了。

記得學校有人主動整反修例留言板、進行罷課等等表達自己嘅立場。可能好多人覺得你哋呢啲學生識啲乜嘢，但，通識科強調批判性思考，我哋學生都有自己嘅批判性思考。喺學生嘅角度去睇，反修例事件本質上可能冇問題，但當中嘅含義、內容似乎都有所不足。

宜家係2023年，通識科已成為「歷史」，教育局已經將通識科改為公民及社會發展科，亦都將好多教材、有價值探討嘅議題刪減，更加將此科目嘅標準改為以合格、不合格。究竟通識科的本意：批判性思維、多角度思考、拓展國際視野仲會唔會延續到？我估要等未來嘅學生話返畀我哋聽。

有時我喺度諗，如果通識卷有條問題問：你多大程度認同通識科有效培養學生的批判性思考？

我會答：我很大程度同意。

論點：通識擴闊同學國際視野，令同學多角度看待以及思考社會以及國際的問題。

駁論：有人認為通識不能培養學生批判性思考，反而令學生吸收了過分或放大社會問題……

通識科所學嘅唔單只係硬件上嘅知識，正如我舉嘅例子，通識亦令我哋分析問題嘅能力上升，了解到答題技巧及框架嘅重要性，就好似寫緊一篇議論文咁，你要點樣說服人哋支持你嘅論點，呢一啲技巧直到我升上大學都繼續用緊。

我宜家兼職教琴，有幾個初中學生問我：以前嘅通識同宜家嘅有咩分別，問我本書係點，又問我以前係唔係有個議題叫「今日香港」。

好難想像香港學生可能唔知道 「港人治港」、「高度治港」、同「三權分立」等嘅意思。國民身分認同固然重要，但多元身份亦都係值得香港學生思考嘅。只盼望經歷過通識科嘅學生可以好好記住學過嘅嘢，有機會可以分享、傳承我哋所學嘅通識畀更多香港人。

                                                                                                                    —- Alisa (U Yr 2)

▌［老師早晨］作者簡介

退休資深通識老師