這一集，是 Louis 寫給牆內朋友的一封信。多年來，他與已被帶到牆內的「她」追星，追達明一派，追明哥黃耀明。他們追星的程度，跟現在狂熱的「粉絲」一樣。目前，一個已在牆內，明哥在香港也無法找到場地演出，所以，兩人再也無法親自追星了。

雖然有很多個「不能夠」，但經過這幾年的歷練，Louis沒有期望，也沒有失望。他仍懷著一份信念，相信終有一天，能夠和「她」在香港聽明哥唱歌。

==============

親愛的___

從朋友口中知道，

你又呻冇人寫達明一派嘅野畀你喇。

咁啱收音機正正就係播梗達明嘅歌，

唔知你又有冇一齊聽到呢？

2013年認識你之後，我地都會一齊去睇達明嘅Live。

我身邊唔多人追達明，

你嘅存在，

令我每次都有人分享達明嘅好。

今年明哥邊走邊唱演唱會，

我冇錢喇，飛唔到去外國睇。

但我點都會盡力記錄每一場畀你知，

因為自從認識你以來，

我知道你對佢哋嘅愛有幾深。

五月尾知道個show取消左，

搞到我個人好Emo，哭__左果隻唔開心。

但唔緊要，我會繼續等，

我知你都會。

六年前有次同你唱K，

我哋由頭到尾淨係唱黃耀明嘅歌，

最後你幫我錄「身外情」。

我一直好愛呢首歌，

「原諒我不記得忘記」係好高嘅境界，

人生太多事情只能夠讓佢發生，

唔想記得嘅偏偏會記得，想留住嘅偏偏會走。

自從同你唱過一次K之後就夾唔到時間再唱，

好想快啲再同你唱，一個人唱哂好悶架。

我等著你回來，

好期待我地可以一齊再睇明哥同達明，

繼續等開個唱嘅一日，

以及大家歸隊嘅一日。

Louis字