今個星期，《綠豆》製作咗兩條有關 BNO 簽證嘅報道，喺有限嘅人手同無乜資源嘅情況下，真係做到「綠豆仔」肉體同荷包都好大嘅損失！

話說星期一，英國國會辯論 BNO 簽證 5＋1 會否延長，辯論喺下午四點半開始，講足三個鐘到七點半。幾個「綠豆仔」即刻寫稿、核對資料、剪片、翻譯、執字幕等。因為辯論限時三個鐘但想發言嘅議員好多，去到中後段，議員都抓緊時間，越講越快，好多位都「雙層牛肉巨無霸」上身，唔好話寫唔切，係聽都聽唔切。

另一個大挑戰係認人！大家可能覺得，尊貴嘅國會議員你哋都唔認得，抵打！事實係：真係唔會認得哂。英國國會有650名議員，在西敏廳出席辯論嘅大部分都係後座議員　backbenchers，平時多數關心所屬選區嘅工作，傳媒鎂光燈亦較少落喺佢哋身上。議員發言前唔會報上名來，咁佢係邊個呢？呢啲基本資料當然唔可以錯，於是核實再核實，人名、選區、政黨。

政黨？！喂！大部分發言嘅都係工黨同自由民主黨議員，咁......報道咁多工黨講嘢，《綠豆》仲唔係「左媒」？作為傳媒，我哋都冇辦法改變邊個行入議事廳，又，邊個企起身發言。

一班「綠豆仔」都係移英港人，大家夜晚喺屋企要應付嘅家務，並唔會因為國會辯論而唔使做，可能只係冇咁準時做。於是偶爾加插煮飯、湊仔環節，少啲耐性同心力都應付唔到。結果，整理咗國會辯論嘅短片喺半夜兩點出街。唔好意思，相信大部分喺英國嘅觀眾嗰陣時應該都瞓哂覺～～

不過，「綠豆仔」就無覺好訓啦，事關第二朝，即係星期二中午，我哋約咗其中一位國會議員 James Naish 做專訪，地點喺倫敦國會大樓內。入國會，本身都要預時間做保安檢查，仲要遇著星期初倫敦地鐵大罷工，啱啱 Chur 完隻故仔嘅「綠豆仔」，分散各個城市，要入市中心，真係一大挑戰。

前一晚做到半夜，三、四個鐘唔夠，一早又再出門。因為無地鐵，但要確保準時到達，有人要搭船入市中心（係相對唔平嘅 Uber Boat），有人就坐火車再步行。好多倫敦市民嗰幾日改為踩單車返工，但「綠豆仔」因為仲要揹住好多攝影器材，只有靠雙腳，你話係咪肉體同荷包都好大損失！

訪問順利完成，大家一聲拜拜遠去這都市，換返對收埋喺袋嘅波鞋逆向「長征」返屋企，即刻寫稿剪片，準備喺訪問後24小時播出！真係少啲堅持都唔得！

星期二晚，各人又係做到頭暈眼花～ 結果順利完成，喺星期三下午，呢個MP專訪順利出街～

我諗大家都會明，播出一條片，背後係一班人嘅心血，仲要喺呢種無乜人手資源嘅情況下趕新聞，真係燃燒生命嘅做法。寫到呢度，都係想請大家多多支持，你哋長期同穩定嘅支持，對維持我哋運作好重要呀！